Munnleg forteljing
Eventyra fanst som munnlege forteljingar i mange hundre år før dei blei skrivne ned. Å fortelje munnleg er framleis viktig, både som underhaldning og for å ta vare på kunnskapar og tradisjonar. Når du fortel munnleg, får du mykje nærmare og betre kontakt med publikum enn når du les opp ein skriven tekst. I munnlege forteljingar er det lov å overdrive og late som om det du seier er sant. Humor er også eit godt verkemiddel – så lenge han ikkje blir brukt til å gjere narr av andre. For å bli ein god munnleg forteljar kan du bruke forteljarknep.
Bli ein god forteljar:
Lær deg forteljinga
Lær deg forteljinga
- Les nøye og lag ei skjelettforteljing ut frå hovudpunkta kven, kva, kvar, korleis og når.
- Vel nokre detaljar du synest er viktige.
- Øv på å hugse forteljinga. Sjekk at du hugsar svara på kven, kva, kvar, korleis og når.
- Prøv å sjå føre deg forteljinga som ein film.
Bruk forteljarknep
- Bruk fantasien og legg til detaljar som beskriv personar i forteljinga.
- Lag samtalar mellom personane i teksten på din måte.
- Tenk over korleis stemninga er.
- Bruk ei stemme som passar til stemning og innhald.
- Legg inn pausar der du meiner det er viktig. Det kan vere ved viktige ord eller når spenninga nærmar seg høgdepunktet.
- Legg til ansiktsuttrykk som understrekar stemninga.
- Bruk forteljarknep som fell naturleg for deg.
Øv godt
- Snakk høgt og tydeleg.
- Snakk i eit tempo som passar til deg og forteljinga.
- Øv framfor spegelen. Førestell deg at du står framfor publikum og fortel for dei.
- Få ein annan til å høyre på deg før du framfører for publikum.
Fortel
- Vent med å begynne til publikum er klare.
- Ha augekontakt med publikum. Vel gjerne nokon som ser interesserte og velvillige ut.
- Lag stemning rundt framføringa. Du kan for eksempel bruke stearinlys.
Gi og ta imot respons
Fortel for kvarandre i små grupper. Den som fortel, bruker forteljarknepa. Den som lyttar, gir respons ut frå lista med forteljarknep, for eksempel: Stemma di var … Augekontakten din var … Du hugsa innhaldet …
